Ehr het dä Dag sym Namme wirgglig gmacht:
So wytt me gluegt het, het aim d' Sunne glacht;
Dä Himmel, wolggelos und strahlend blau
(Statt wie dur d' Wuche dure Grau in Grau).
Dä Schnee, wie Silber, rings uff Wald und Fäld,
Uff Dorf und Stadt – e wohri Wunderwält –
Tief het me-n-Otem gholt, fascht otemlos,
Und gspyrt: 's isch aine, unsichtbar und grooss,
De Mensche-n-und im Menschefride hold –
Oh Goldigsuntigs-Gold!
Die ganzi Stadt – dr raini Duubeschlag!
Gspyrt hänn au d' Gschäftslytt: 's sich e Sunnedag.
D' Natur in ihrem Glanz, e-n-Augewaid,
Het d' Mensche-n-aagsteggt, gfillt mit Feschtdagsfraid!
Dä Dag het aifach feschtlig miesse stimme
Wie kain im Johr und wie syt langem nimme.
In hääle Streem sinn d' Lytt an d' Luft go laufe –
In hääle Streem go Wiehnachtsgschängger kaufe –
In hääle Streem isch ene 's Gäld in d' Kasse grollt,
Das goldig Suntigsgold!
Dä Dag z' vergässe, wär e wohri Sind!
Und wenn D' dra dänggsch, so dängg dra, Menschekind:
Syg au dur 's Johr gar mänge Dag tief grau –
Aimol kunnt 's als doch wider, 's Himmelsblau!
Und dunggt Di mängs im Läbe trieb und schwär –
's kunnt allewyl e Sunne naimehär!
Und 's kunnt noh schwärer Zytt voll Sorg und Glaag
Fir jede Mensch als doch e Sunnedag!
Dängg dra und hoff – stell 's wytter in Dy Sold,
Das Goldigsuntigs-Gold.
Martin Bim
Publiziert am 23. Dezember 1935 in der National-Zeitung
Anm. d. Red.:
Der Begriff "hääl" bedeutet laut Basler Wörterbuch von Rudolf Suter "hell" oder "ganz".
Beispiel: "In hääle Streem" = in ganzen Strömen / "In hääler Uffreegig" = in heller Aufregung / "hääli Angscht" = nackte Angst