Hoplä d› Zyttig kunnt

Wär in e Zyttig schrybt, muess imposant erschyne…..
Drum gseht me by Redaggter maischtens Dänggermyne,
Sie stuune sorgevoll – doch kaine dänggt, y wett,
Dass mängi Huusfrau hitt ganz anderi Sorge hett.
Und doch: Au d’Huusfrau kennt e Zyttig nit entbehre –
Liest si au nit so vyl, wie Ihr, Ihr gscheite Here,
So het si doch e ganz bestimmt Inträssi dra –
Si list si zylbewusst, drum fangt si hinde-n-a!
Was d’Redaggtore schrybe isch dr Huusfrau wurscht –
Was bruucht si uus dr Zyttig fir ihr› Wissesdurscht? :
(läuten!)Hoplä d’Zyttig kunnt!
Gschwind e Bliggli dry:
Wär wird gstorbe sy?
Was git’s fir Ungliggsfäll? Wär het e Kind beko?…..
Dr ganzi Zyttigsräscht isch Mumbitz sowieso.

Gehnd uff dr Märt, gehnd ixbeliebig in e Lade
Und lueget, was e Zyttig nutzt, das ka nyt schade:
Ins Fröiläin Begg, do paggt me Hoseträger y,
Ins Fröiläin Amstai kunnt e Guttere Konsumwy –
Ins Büechis Inland kunnt e Käs (es wird sy Gligg sy) –
Im Strub sy Grossrootsbricht, dä kunnt um Bodewixi –
Und in e N. C. G. Artikel braichts der Kohl,
Und ’s macht em nyt, im Geegedail, es tuet em wohl!
Der gsehnd: Was dinne stoht, das isch fir d’Huusfrau wurscht –
Was bruucht si uus dr Zyttig fir ihr Wissesdurscht? :
Hoplä, d’Zyttig kunnt,
Gschwind e Bliggli dry,
Wär wird gstorbe sy?
Was git’s fir Ungliggsfäll? Wär het e Kind beko?
Dr ganzi Zyttigsräscht isch Mumbitz, sowieso!

Doch au fir anderi Zwägg isch d’Zyttig mänggmol wichtig:
Mit rächte Speenli git’s e Fyrli, das isch richtig –
Als Schueh-Ylag, do schitzt sie aim vor kalte Fiess –
Au haig sie Zwägg, wenn jemols ’s Crêp›-Babyr nimm bschiess!
Ob’s jetz e Reed braicht vomene Diktatur-Blagöri –
Ob’s nur e Laitartikel braicht vom Doggter Oeri –
Ob vomene Kuehn e Värs vo Film und Haimetschutz –
Ob vom O.M. e Schubert-Weini-Wittchen-Sprutz –
Das isch im Fyr, de Fiess und au im Wasser wurscht.
Hoplä, d’Zyttig kunnt,
Gschwind e Bliggli dry,
Wär wird gstorbe sy?
Was git’s fir Ungliggsfäll? Wär het e Kind beko?
Dr ganzi Zyttigsräscht isch Mumbitz, sowieso!

Kunnt soone Zyttigshirsch emol in Zyttigshimmel –
Denn kritisiert er zerscht ’s Halleeelujah – Gebimmel –
Denn sinn de-n-Aengel ihri Fägge z’wenig gstutzt,
Und ’s Petruspult, das isch em z’glai und z’suuber butzt.
Denn interviewt er handkehrum au scho dr Adam,
Und sälle Trottel git em Uuskumft, bis sy Madam›,
Die gscheiti Eva kunnt, e Boa um dr Hals –
Die lacht e bitz, und sait zum Adam beschtefalls:
By Dir het synerzyt e Epfelbutze gniegt –
Mit däm sym Epfel hättsch vo mir kai Epfel griegt –
Hänn Si ’s Freibillett?
Ah, Si hänn’s, famos -/ Jetz goht d’Kilbi los –
Si grinde sicher in ere Scheefliwulggeflucht
En Art Depesche-Agäntur mit Äntezucht.