En Uhr – das isch en aigni Sach –
Das läbt wie mir – das stirbt wie mir –
Nur länger läbt ’s, wenn ain vom Fach
Si gmacht het, denn das Gschär und Gschir
Wo byschpilswys d’ Japaner mache
Mit ihrne-n-Uhre, ’s wär zum lache
Wenn ’s nit so himmeltruurig wär !
’s Pfund siibe Frangge gänd si ’s här !
Do sträubt sich üsereim doch z’ Haar
Und d’ Uhre sin wie d’ Japse : Lumpewaar !
En ächti Schwyzeruhr zeigt nid nu Tag u Stunde
Die geiht haarscharf bis uf ne Hundertschtel-Sekunde !
Jahruus, jahry weisch gäng wora de bisch, y wett
Nur die Herre i Bärn
Nur die Herre i Bärn
Die wüsse mängisch gar nit was es gschlage het !
Die da, die isch vo Sumiswald
Die Qualiteet isch altbekannt,
S’ isch 150 Jöhrli alt !
Es isch damals im Schwyzerland
Rächt strub zuegange, muess me säge :
D’ Franzose sy bi Grauholz gläge
Doch z’ Züüghuus z’ Bärn isch gschlosse gsi –
Si sy im Volkch nit sicher gsi –
’s Volkch het sich gwehrt, so guet ass ’s cha –
’s fallt mänge schlichte, guete Ma –
Die Sumiswaldere het en Schutz verwütscht da unde –
Z’ Grauholz, da hei für d’ Schwyz agfange bitteri Stunde –
Uus Eidgenosse-Freyheit wird uff z’ mal Franzoseteig !
Nur die Herre i Bärn
Nur die Herre i Bärn
Die hei scho sällmal nit gwüsst, was es gschlage heig !
U’ wider hei mir schwäri Zyt
Ne Chrisezyt dass Gott erbarm
Wo üses Métier z’ Bode lyt
U mängs derzue – ’s wird mänge-n-arm !
Muess üses Volkch nit bald verwache ?
Söll d’ Schwyz Parteie z’ lieb verchrache ?
Wurum isch z’ halb Volkch schlächt im Strumpf ?
Worum sy z’ Bärn nu Sprüch gäng Trumpf ?
Wird ’s Läbe tüür – me tuet kei Wank –
Und ’s schynt eim, beidi Parlamänt sy chrank !
Si hocke zäme, tüe vyl brichte u berate –
Si rede vyl – doch leider merkt me nüt vo Tate
Und o dr Bundesrat het no kei Uuswäg gfunde. –
Derby zeigt d’ Schwyzeruhr die letschte beide Stunde,
Dr Zeiger rütscht – me luegt ufs Zyt u hockt dernäbe –
U ’s Volkch das wartet, Jahr und Tag – u gäng vergäbe !
Ei Wunsch hei mir – mir wüsse alli lang scho was mer wei :
Dass die Herre i Bärn
Dass die Herre i Bärn
Zuer rächte Zyt no merke, was für Zyt mer hei !
Verfasst in Berndeutsch als Lohnauftrag zum Thema "Uhrenkrise", vermutlich 30er Jahre.