Das isch e glungeni Gschicht! Y mecht ’s verzelle,
Wie my Frind Max, ohni dass är ’s hätt welle,
„Kunschtkritiker“ worde-n-isch!
In säller Zyt
Hänn sich e Hampfle gschäftlig tichtigi Lytt
In userer Stainevorstadt zämmegschlosse,
Und amene scheene Dag hänn si beschlosse,
De Mooler z’ hälfe ( und sich sälber au! ).
Bald hett me denn in jedem Monterebau
( Fir jo dr Standard vo dr Kunscht z’ erfahre )
E Helge gseh zmitts under hundert Ware,
Vom Ballglaid bis zem pfitzte „Homespun“-Kiddel,
Vom Bruchband bis zem Hämmoridemiddel,
Vom Rysbleiabsatzschiehli bis zem Fungge,
Vom Schwartemage bis zem zartschte Schungge,
Vom Batzeweggli bis zer fynschte Darte,
Vom Gotthälf bis zem kriminelle Schwarte,
Vom Dintekuli bis zer Papeterie,
Vom Bambusbakel bis zem Barebly,
Vom Maiehafe bis zem Grälleligranz,
Vom Doubléring bis zem Brillianteglanz –
Kurzum: In jedem Fachgschäft . . . je ai Helge!
Dr Max, wo sunscht gärn in dr Kunscht duet schwelge,
Het mer verzwyflet brichtet: „Kumm go luege!
Die hittige Mooler sinn doch uus de Fuege!
’s isch grauehaft, was die hitt zämmeschlirgge –
Fir mi tuet ’s kunschtanalphabetisch wirgge!
Nai: Hitt isch d’ Moolerei komplett verdrottlet!“
Bald biny mit em Max dur d’ Staine zottlet
Und ha dä Helgerychtum wortlos bschaut
Und häl nytt gsait – y hätt mi gar nit traut,
Bis mir Zwai vor e Metzgerlade ko sinn –
Do gspyr y doch e lychti Spur vo Frohsinn:
„Dä Helge doo, Max “ ha-n-y halblut gsait,
„Isch ebbis, wo au Dy Kritik verdrait:
Doo gseht me-n-uff ai Bligg, was dä hett welle!
Dasch nyt Abstrakts – das wirsch mer nit verzelle!“
„Kenntsch rächt ha!“ sait dr Max: „Die Uusnahm doo,
Das isch e Waldbrand! Und guet uusekoo!
Dasch no-n-e Mooler, wo-n-aim nit verkohlt –
E Mooler, wo no gegeständlig moolt!
Goht aim dr ibrig Gibbs au glatt uff d’ Niere –
Däm muess y zue sym Waldbrand gratuliere!“
So simmer in dä Lade-n-ynegschnejt
Und sinn denn gopfergässe-n-ynekejt!
Denn unsere Metzger längt dä Helge fire
Und trait en – wäg dr Haiteri – an d’ Tire,
List uff däm Waldbrand hinde d’ Etikette
Und lacht und sait:“Do hätt y kenne wette,
Das kenn nur ains sy, doo bruucht ’s kai Erfindig –
Dr Mooler tauft das Bild: Blinddarmentzindig!
Bliddarmentzündung einer jungen Gaiss!“
My Max wird grydewyss und kunnt in Schwaiss
Und schnabbt noh Luft . . . mir blybt si glatt ewägg . . .
Hitt waiss y: Das Erläbnis hett e Zwägg
Und wird in Zuekumft mir ganz sicher diene!
Denn wenn ’s mer jee sott bliejen oder griene
Und ’s kämt dr Fall, und ’s miessti ebbe sy,
Dass y in Spiddel kämt – in d’ Chirurgie,
Will ’s mi dät in dr Huft rächts unde stäche,
So dät y mer my Kopf nit lang verbräche –
„Her Doggter“ sait y, ohni mi z’ scheniere:
„Y glaub, Si sotte mir my Waldbrand operiere!“
Publiziert am 9. Dezember 1962, vermutlich in der „Basler Woche“.