Mir sinn am Disch, die Glaine, d’ Frau
Und ych und noh zwai Here
Und an däm Dag ’s Groossmammi au –
Das tuet als gärn belehre . . .
Mir Männer hänn e Fläschli Bier ;
Do bättlet ’s : „Babbi – Schuum !“
Y sag nit jo und sag nit nai –
’s Groossmammi, das sait : „Kuum !
Waisch Urs, wär Bier trinkt, wird nie grooss,
Dä blybt sy Läbe glai !
Drum gitt ’s es nitt, y duld ’s au nitt,
Schuum gitt ’s e kaine, nai !“
Dr Bueb stiert fescht das Fläschli a,
Und will er konsequänt isch,
Schihlt er die Frau a vis-à-vis
Und waiss, wär ’s zletschtamänd isch . . .
Denn sait er immene Lachgrampf inn,
Und ’s teent ganz haiser, grächzig :
„ Groosmammi – Du muesch vyl gschmurt ha !“
(Si isch e Meter sächzig !!! )
Bolo
Zweite Hälfte 40er-Jahre.