Gäld oder kai Gäld …

Wär Gäld het, kauft sich Taffet oder Syde
Und schnyderet uff d Fasnacht, Dag und Nacht —
Wär kai Gäld het, bruucht doch nit drunder lyde,
Denn au fir ihn isch d Basler Fasnacht gmacht!

Wär Gäld het, ka sich au e Gostym kaufe —
Wär kai Gäld het, dä sträng sy Hirni a:
Er bruucht jo numme uff dr Estrig z laufe,
Dert wirds ganz gwis no altı Fätze ha!

Wär Gäld het, kauft sich fabelhafti Ballschueh —
Wär kains het, ka als ‘Anishänsli’ ko;
Für das Gostym het er uff jede Fall Schueh:
Dä hesch in Laggschueh nie gseh ummestoh!

Wär Gäld het, ka-n-e Smokinghemmli kaufe —
Wär kai Gäld het, syg jo nit gross scheniert:
Er muess nur richtig wisse s Gostym z daufe,
Denn duets au Barchet (richtig ‘uff-frisiert‘)!

Wär Gäld het, kauft e Larve, e bombbeesi —
Wär kains het, näm en alti, halb verdruggt:
Massgäbend isch jo s Fasnachtsmuul, das beesi,
Was nutzt e Larve, wenn sich ains — nit muggt?

Wär Gäld het, kauft sich Sydestrimpf und -sogge —
Wär kains het, bruucht die Frog nit tragisch z näh:
Mit Zyttige um d Bai blybsch au nit hogge —
De muesch di nur entsprächend witzig gä!

Wär Gäld het, isch vilicht uff Schämpis gluschtig,
Wär kains het, schaff sich scheeni Libbe a
Und mach sich binere Bygi Schmitzli luschtig,
Was me au ohni z dyre Jooli ka!

Wär Gäld het, wird wohrschynlig Fasnacht mache —
Doch wär e kains het, dä kas grad so guet:
Dr Gaischt macht d Fasnacht uus, nit ‘scheeni’ Sache –
Dr Gaischt, dr Witz und — s Basler Fasnachtsbluet!