Als Bueb hesch ganz mainaidig Lambbefieber –
Der Concours-Saal dunggt Di ai Wieschtenej –
Dy Muet verschlieft sich, d’ Zueversicht wird trieber –
Wenn alles scho verby wär, wär ’s Dr lieber –
Wär nur dä Schlotter nit in Dyne Gnej . . .
„ Worum schällt als das Jury-Gleggli nit ?“ –
Dy Pulsschlag duet wie lätz : ’s Härz drummlet mit !
Als junge Burscht macht d’ Sach en anderi Falle :
D’ Frächhait isch Drumpf ! Stolz rätzesch Du Dy Marsch !
Schloosch uff dr Raif und styggt Dr blizschnäll d’ Galle
Und . . . ’s lyttet nit, losch d’ Galle wider falle –
Gsehsch d’ Jury-Rysblej gritzle, dänggsch Dr barsch :
„ Sooo kimmispalte bruuchte die jo nit !“
Und graftvoll schloot Dy Puls : ’s Härz drummlet mit !
Als „Matador“ hesch ’s Gfiehl, hitt kenn ’s nit fähle !
Kunnsch Dr als „Primus inter pares“ vor !
Du muesch kai Mihlireedli anequäle –
Dy Wundertechnik ka Dir niemeds stähle –
Du waisch : Bim Uusstich goth ’s knapp um e Hor !
Bis De-n- . . . e Värs nimm waisch . . . denn hesch dr Kitt –
Denn schloht Dy Puls d’ Ladrätt . . . ’s Härz drummlet mit !
Als Ryffe gohsch uff ’s Ganz. – Lueg, wie si loose !
Worum fallt alles wunderfältig uus ? :
Dy Standpunggt isch : „ Mir ka die Jury bloose !!!“
Drum hett Dy Vortrag nit dr wunzigscht Moose –
Fir d’ Jury Schlag fir Schlag ai Ohreschmuus.
De gschpyrsch, ass ’s an däm Dag kai Bessere gitt —
D’ Rueh sälber isch Dy Puls - ’s Härz drummlet mit !
Als alte Keebi und bewährt Semeschter
Blybt Dir ’s Brysdrummle häl e Symphonie.
Isch ’s Gstell au zimlig morsch – jung blybt Dy Seschter !
De luschteresch no gnau wie vorvorgeschter
Und fangsch die herligschte Fynessen y !
Und selig gniembbsch denn haim . . . im Fasnachtsschritt
Isch au Dy Puls rächt mild – ’s Härz drummlet mit . . .