Waisch, wo dr Wäg zem Gulde goht?
Er goht de rote Chrüzere noh.
Wie goht der Wäg zem Bundesrot?
Wenn aine goht - wär wählt me doo?
Denn wird's halt Ain - glych wiener haisst -
Es goht de Vitamine noh,
Und wär nit die Beziehig hett,
Wird zue däm hoochen Amt nie cho!
Waisch, wär mer kriege uff die Art?
Ain, wie mer jetz scho gnueg hai gha:
Gwüs e Kantons-, Parteie-Hängscht -
Was fange mir mit sooo aim a?
Dänk 's glych, wie jetz durane scho:
Dä hockt uff's Ross, mir luege zue -
Mir hai kai Rächt und hai kai Gwalt,
Und dä spilt mit is "blindi Chueh"!
So isch es gsi - und so wird's sy:
D'Helvetia blybt im Wuchebett,
Wenn 's Volk nit ändlig Dokter spilt -
Aes, wo der Griff am Hebel hett!
Waisch, wo der Wäg zem Gulde goht?
Er goht de rote Chrüzere noh.
Im Militär-Milliardebett
Merksch z'spoht: 's hätt chönne anderscht goh!
Hütt hänn si in där' tolle Stadt
Fasnecht! Do lytt als öbbis drinn.
Si zäige mängem d'Wohret dick -
Drum hänn die Täg e tiefe Sinn.
Löhnd d'Fasnecht läbe, wie si isch -
Si hett scho mänge z'Bode glait,
Und wär die Fasnecht hasst wie Gift,
Dä hett au d'Wohret nie vertrait!
J.P.H. redivivus.