Basler Kaländer – Dr April

Dä Moonet isch bikanntlig wätterwändisch
Wie d Gunscht vom Volgg, wenns ehbe Wahle gitt.
– Gang jetz vor d Stadt: Wo no rächt Buuregländ isch,
Gsehsch d Schwalbe pfyle (in der Stadt jo nitt);

Dr Kirsibluescht isch wider s himmlisch Wunder.
Me ka vyl Pfafferehrli-Suechere gseh;
Und groote mänggmol Jungbrennessle drunder,
Machts nytt – das gäb e prima Nieretee.

Vyl Mamme dien ihr Kind am Händli fiehre:
Es macht der allererscht Gang schuelhuuswärts!
Dä wichtig Schritt ins Läbe tuet si riehre,
Und haimlig duets e bizzli weh im Härz.

s Härzglopfe ibernimmt au d Komfermante,
Wo blaich mit gsänggte Kepf in d Kirche gehn.
Die erschte Glacehändsche vo dr Dante
Sinn – wie dr Gsangbuechgoldschnitt – aifach scheen.

Wenn z frieji Summerveegel d Fäggli spraize,
Losst me dr Ofe s erschtmool uus em Spil –
Und gly druff abe muess me wider haize,
Will d Mamme stehnt, dass es si halt no pfil.

Dr Rhy hett friejer im April unglooge
E Rolle gspilt: Dr Nasestrich isch ko!
s hett an de Galge d Netz als richtig booge,
Millione Nase hänn ihr Läbe gloo.

Hitt kasch am Rhy bym Fische … d Nase butze;
Wenn hitt ain ‚aini‘ fangt und bringt si haim,
Dien ab däm Gstangg die scherfschte Katze stutze
Und gehn wie s Bysiwätter ab uff d Baim.

Derfir bringt d ‚Muba‘ hunderttausig Nase
Pro Dag – wär hätt das anne Sibzäh dänggt!
Wenn d Limmathié vor Nyd au driber rase:
Das Faktum isch denn nitt … aprillegsprängt!