Basler Kaländer – Dr Juni

Dr Juni wird im Grund minym bedichtet,
Obwohl dä Moonet voll Eraignis isch!
Mantig fir Mäntig wird jo driber brichtet
Im Blatt, am Stamm- wie am Familiedisch:

s gitt Muusig-, Sänger-, Turn- und Schitzefeschter
Vo Basel bis uff Ammel! Und es quält
Ai Froog dr Feschtli-Voyageur im Seschter:
Wie soll ers mache, dass er kains verfählt!?

s gitt usserdäm fanatischi Semeschter,
Die mien an jedes Veloseggle goh!
Und wenns e Rhysportfescht gäbt am Sylveschter,
Stiengte die glyche Feschtli-Dyssy doo!

Das isch en aigeni ‚Junikäfer‘-Bande:
Sunntig fir Sunntig gänn si sich e Rugg –
Niechter dien si an jedem Feschtort lande
Und kemme znacht als ‚Fahneschwinger‘ zrugg!

D Stadt Basel kennt ai bsunderi Feschtlisorte:
s sinn d Jugedfeschter, traditionsrych, flott.
Sinn si au zyttentsprächend glainer worde –
s isch ebbis, wo me nie verbasse sott:

Dr Wilhälm Täll rutscht an dr Glätterstange –
D Helvetia macht bym Wirschtlischnabbe mit!
(Im Läbe ischs grad umkehrt, denn do glange
als d Täll-Sehn, bis s ‚Helvetia-Wirschtli‘ gitt!)

Wo d Kinder spile underem blaue Himmel,
Sygs in de Erle, uff dr Schitzematt,
Stoht me mit Wurscht und Brot am Rand vom Gwimmel
Und dänggt an d Jugedzytt … und findets glatt.

Änds Juni hert me d Veegel sälte pfyffe,
Denn d Noowuggs-Fueterfroog gitt mächtig ztue,
Und d Jungbruet muess mänggs lehre und begryffe-
Gar bald gohts innere färne Haiimet zue.