Basler Kaländer – Dr Oktober

Dä Moonet suecht an Rychtum synesglyche,
Sygs punkto Obscht, sygs punkto Bluemefloor.
Gsehsch d Märtlytt als bym Zaineschlaigge kyche?
Der Märt kunnt aim schlaraffeländisch vor.

Hett ain nitt grad e Hang fir s Vegetarisch
Und raize en Abmagerigs-Obschtdäg nitt,
So braicht er jetzt e Zytt, wo wunderbar isch,
Wills wider Reh- und Wildsaupfäffer gitt.

Me gseht die letschte Vogelzig am Himmel
Und waiss: Au mit em Herbscht gohts bald verby.
Und geege s Moonetsänd mahnt aim s Gebimmel
Vom Martiskircheturm: D Mäss lyttet y!

Mir Alte finde zwor, dass si nimm s Glych syg
Wie friejer, denn si syg vertechnisiert!
Un s dunggts, dass si zue fescht nur lärmerych syg!
Die Junge aber finde ys borniert.

Si sinn halt in dr Technikzytt uff d Wält ko,
Hänn nie e Haidelbeerifraueli gseh,
Wo uus em Schwarzwald ko isch (und ze Gäld ko!)
Und kenne au kai Wällelihändler meh;

Soo Manne hert kai Mentsch meh sich 'verzelle'!
Wär fyrt no Wälleli? Eel fyrt me y!
Do hilft kai Rosekiechli - s isch nytt z welle -
Die alti Mässzytt-Poesy? Verby!