Schueljohrschluß!

Schueljohrschluss

„Juchhee, jetz isch das Schueljohr us,
Und d’Ferie sinn do!
Juchhee, jetz mues y wuchelang
Nit in e Schuelklaß go!
Wägg mit däm schwäre Rächnigsheft,
Wägg mit däm dicke Buech –
Jetz gehn mer, wenn’s nit rägne duet,
In Fäld und Wald uff Bsuech!“

So jublen Anneli, Rösli und
So juchze Hans und Fritz;
Kurzum: e jedes Gettikind
Suust haimwärts wie dr Blitz!
’s Schuelränzli bolderet wiene Narr,
Wo’s in en Ecke fliegt,
Au d’Mappe het bym Flattere geschwind
E Nasestüber griegt!

„Enai, was isch das fir en Art?“
D’Großmamme frogt’s erstuunt;
Dr Babbe nimmt si underem Arm
Und maint, ganz glunge gluunt:
„Was das au fir en Art syg, mainsch?
D’Schuelzyt isch us, he jo!
Isch nit au ’s Groß, wie jedes Kind,
Als iber d’Ferie froh?

D’Großmamme dänkt e bitzli noh,
Denn – zwinkeret si und lacht:
Si het’s als Kind vor sächzig Johr
Jo au nit anderscht gmacht!
„’s isch rächt eso!“ So maint sie denn:
„’s isch rächt – – so mues es sy!
Doch sind, wenn ’s frischi Schueljohr kunnt,
Mit glycher Fraid derby!“


Veröffentlicht in Dr glai Nazi am 04.04.1928