Bim offene Fänschter sitz y no bim Schrybe,
Do kemme sälteni Gschepfli an my Schybe,
'Inseggte' sait mene, s isch jo vyl meh!
Me muess die Wunderdingli numme gseh.
Do isch grad ains -- es isch e wohri Bracht --
E soone Stoff hett no kai Wäbstuehl gmacht!
Dä Falter isch kuum fingernagelgross,
Fliegt zerscht zem Liecht, und fliegt mer denn uff d Schoss ...
Und wippt ... und blybt. Ehrfirchtig lueg en a:
Er hett e sydefyne Mantel a,
s isch wie Brokat, uus hällem Silber gwobe,
Baidsyttig ud de Mantelfligeli obe
Gseh-n-y e Stärnli schimmere, sältsam glar --
Und bletzlig waiss y: Soone Art Talar
Hänn in der Renaissance ganz Grossi drait
Me hett ene Firscht ... Keenig ... und Kaiser gsait,
Und Wältgschicht hänn si gmacht!
Do sitzt dä Falter, sy Fligelschwire summt,
s deent wiene Psalter uff dä, wo jedem Wäse s Läbe git.