Fir dr Herr Scholer
Wenn z’ Basel ix-e Feschtli isch
Mit de Regierigsränze,
So will doch jede Schyssverain
Mit Ehredame glänze.
Die holt me jede Dag, wo ’s braicht,
Ob Frau, ob Grytte, Dante,
Mit absoluter Sicherhait
Im Rahme vo Verwandte !
Wär muesch an jedem Fescht persé
Als Basler Ehredame gseh
In iebligem Gedrepfel ?
E Hampfle Läderepfel !
Isch z’ Bärn e Fescht, isch z’ Gämf e Fescht,
Duet Ziri „fäschtlich“ fyre,
Ruggt d’ Sektion Basel „feschtlig“ a –
Es isch die alti Lyre :
D’ Muusig duet voller Heldemuet
D’ Rossbollehymne schränze –
Wär gsehsch voll Glück jee links und rächts
Vo der Regierigsränze
Mit Eleganz scharwänze ?
De muesch – und ’s duet Dr noo so weh –
Als Basler Ehredame gseh
In iebligem Gedrepfel
E Hampfle Läderepfel !
Syg ’s jetz im Wältsche, im Tessin,
Im Jura, z’ Posemuggel –
Es macht aim wild, ’s isch ’s ewig Bild
Und mopst aim nundebuggel :
Wo nur e Fescht isch, trybt ’s Di furt,
Gsehsch d’ Basler Ehredame.
De mainsch, stiengs vor ere Epfelhurt –
Das fallt uus jedem Rahme.
Muesch ewig (oh, wie duet ’s aim weh)
Sooo Basler Ehredame gseh
In iebligem Gedrepfel !
Hänn mir nur Läderepfel ?
Sunscht tien in unserer guete Stadt
Doch grad d’ Regierigsränze
Jede Bankettliwuchedag
Durch Erschtglass-Gnuss-Sinn glänze !
Worum duet nur in däm Punggt grad
Ihr Niveau glatt versage ?
Worum duet kain sich by Verain
Und Sektion beklage ?
Worum lehn die das aifach gscheh,
Dass D’ muesch in jedem Feschtzug gseh
In iebligem Gedrepfel
E Hampfle Läderepfel ?
Hett denn nit unseri liebi Stadt
Als bsunder Renommeeli
Der Ruef, sy syg ganz äxtra glatt
In Sache Sächeli – „Rehli“ ?
Si haig der Scheenschti Maitliflor
Ringsum im Schwyzerländli ?
Wär stellti ebbis Scheeners vor
Im Ehredamegwändli ?
Stattdesse losst me ’s ewig gscheh,
Dass D’ muesch in jedem Feschtzug gseh
In iebligem Gedrepfel
Uralti Läderepfel !
Drum mahne mir – ’s isch hegschti Zytt –
Die Here Kommittierte
(Au wenn si underem Duume stehn
Und sich dehaim schenierte) :
Machet däm Spil emol en Änd
Und lehn Eych dytlig sage :
D’ Feschtbsuecher wänn gärn Kalbflaisch gseh
Anstatt so Schwartemage !
Am nägschte Fescht scho mues es gscheh :
Muesch Basler Ehredame gseh
Als jugedfrisch Gedrepfel
Statt Runzleläderepfel !