Wär kennt sich Basel ohni Fasnacht dängge ?
Kai Basler – das z’ biwysen isch nit schwär :
Wär dät an d’ Wand no e Kaländer hängge,
Wo d’ Fasnacht drinne nit verzeichnet wär ?
Und was wär Basel ohni Ehrezaiche ?
Dr Vogel Gryff het eltsti Tradition :
Dr eltsti Basler tät vor Scham erblaiche,
Wenn das nit wisst sy jingsten Änggelsohn !
Au d’ Mäss kennt kain uus en Gedächtnis stryche :
Was miecht men im Oktober ohni si ?
Me dät driebseelig ummenanderschlyche
Und wisst vor langer Zyt jo nit, wohi !
Gäb ’s kaini Jugedfest, es wär e Schade,
E Lugge wär ’s fir mängen alte Hirsch :
De kenntsch nimm in Erinnerige bade,
Obwohl De waisch, wie jung D’ derby als wirsch !
Zue däne vier Bigriff – was isch dr fimfti ?
He, froggsch no : Das isch doch – dr Zirkus Knie !
Y glaub, ass jeden ächte Basler schimpfti,
Träffti dr Knie emol e Johr nit y !
Und gäb ’s en nonig, miesst men en erfinde !
Das bruuchts zem Gligg nit, denn – er isch scho do.
Drumm strahlt me, wenn d’ Plakatwänd aim verkinde :
„Hee, Basler – waisch ’s ? Dr Knie . . . dr Knie isch ko !“
Martin Bim
Publiziert in der National Zeitung im „Morgenblatt“, vermutlich 30er Jahre.