Auftragsarbeit / Werbung für das Restaurant Bürgerstube am Pelikanweg in Basel.
Die neiji Bürgerstube-n-Attraktion!
Hänn Ihr my neije Garte gseh ?
Er isch e Bijou worde –
Me ka vom Pelikanwäg durch
E stilvoll gschwungeni „Pforte“ –
Zerscht isch me baff; Denn sait me: „Nai,
Wär dät au das erwarte ?
Idyllisch mit de scheene Baim
Und Blueme-n-isch dä Garte !
Wie muess e bsunders Drepfli aim
An soome-n-Ort begligge –
Und ’s muess häl e Vergniee sy,
Do gueti Mimpfeli z’ bigge !“
Dr Garte-n-Abschluss aber birgt
E bsunder Attraktieenli –
Wär das gseht, dä sait „Ah“ und „Oh“
Und sunscht Bewunderigs-Deenli !
Denn : Soone feini Kaigelbahn
Isch wytt und bait nit z’ finde –
Das darf y ohni Greessewahn
De Kaigler scho verkinde;
Si isch ’s Mordärnscht – und ainewäg
Gedige do muesch litze –
Do isch ’s e Luscht, sy „Gränzli“ und
Sy „Babeli“ ane z’ pfitze !
Und ’s Stiibli vis-à-vis vom Ris
Isch haimelig wie sälte –
Au wär amänd nur Kibitz isch,
Wird das getroscht lo gälte !
Drum: Wottsch mit dr Familie furt,
Kumm in my neije Garte !
Und wottsch mit Frind zem Kaigelschub,
Duet Di my Bahn erwarte !
Uff alli Fäll notiersch Dr jetz :
„Morn d’ Birgerstube bsueche!“
Denn eb in Gsellschaft, eb elai –
Darfsch ’s als Erholig bueche !
De darfsch au noonem Zolli ko :
Der Birgerstuube-Garte
Und d’ Kaigelbahn (und dr Hans Wahl!)
Dien Di mit Fraid erwarte !
Kegelbahn
Es isch kai Kaigler-Greessewahn,
Wenn ’s haisst: Die wyttuus scheenschti Bahn
Muesch in dr „Bürger-Stube“ bsueche –
Dert isch ’s e Fraid, sy „Babeli“ z’ bueche !
Pagg jedi Glägehait bim Tschupp
Und sag: „Y gang in Kaigelclub !
Denn d’ „Bürgerstuube“-Bahn, muesch wisse,
Isch aifach haimelig, gerisse !“
Garte
By iber 30 Grad im Schatte,
Do git ’s fir Di en Ort, e glatte :
Im kiehle „Bürgerstube“-Garte
Bisch fein bedient, muesch nit lang warte !
E schattig-kiehle Gartenegge
Duet Dyni Läbesgaischter wegge :
In „Bürgerstube“-Garte z’ goh,
Das findsch idyllisch, ’s macht di froh !
Es frait Di grad, uff ebber z’ warte
Im scheene „Bürgerstube“-Garte !
Kumm, lueg en a . . . und sag derno :
„Jääjoo – do wird y widerko !“
Wirsch Du vor Hitz bald rot, bald blaich,
Ass Dir im Kopf dr Käs wird waich –
Kumm doch in „Bürgerstube“-Garte !
Erholsch Di glatt, kasch grad druff warte !