De derfsch dr letschti Bär nimm jage,
Wo dr d’ Krankekasse schiggt,
Derfsch di niene meh beklage
Wenn ’s Hiehneraug dy Zeche piggt.
De derfsch kaim Bogg meh d’ Herner stutze,
und miechsch drmit dr beschti Fang.
De derfsch kaim Sauaff d’ Kuttle butze
– au wenn de mechtsch im erschte Drang.
D’ Trottoiramsle derfsch nimm schiesse
und jede Hornox wo di schellt,
muesch wie-n-e Gentleman begriesse,
au wenn er dir e Saich verzellt.
De derfsch au nit, und wenn d’ wetsch welle,
De Zyddigsänte d’ Häls umdräje.
Und wotsch dr Muusfäld d’ Falle stelle,
no foht si jämmerlig a kräje :
Si haig bim letschte Bruch, ganz unde,
Maistiger uus dr Staizyt gfunde.
Und wenn d’ Regierig ihri Mugge
Und Flöh im Roothuus uuseschwitzt,
no hesch kai Rächt, das Viech z’ verdrugge,
denn d’ Fleh und d’ Mugge sin au gschitzt.