D’ Stadt Basel isch halt doch e Kaff
Und wird ’s au ewig blybe,
Denn: Luust doo Ain emol der Aff,
Wo ’s mecht als Groosshans trybe,
So kann er ’s mache, wien er wott,
Er wird glatt ibertroffe
Vo Aim vo Ziri, hüscht wie hott,
Do blybt kai Hoffnig offe !
Ziri isch halt . . . groosszigiger,
Das gseht me scho an Klote:
Dä Platz isch jo vyl „fligyger“
Ass ’s näblig Blootze groote !
Greesser ass z’ Basel d’ „Breiti“ isch,
Isch z’ Ziri jo scho d’ „Ängi“ –
Was z’ Basel schone Huffen isch,
Isch z’ Ziri no kai „Mängi“ !
Dr Basler macht au schone Gschyss,
Griegt done Wybli Zwilling –
In Ziri sait me bschaidenerwys
Sogar de Drilling: Illing !
Die Zircher Ibrlägehait
(Am Basler Gnorzi gmässe),
Die bringt ys in Verlägehait;
Ai Byspyl losst ’s ermässe:
Z’ Basel, do hett dr Kassier voo
Der Bolizischtemuusig
’s Verainskässeli zue sich gno
Mit ebbe Zäh-, Zwelftuusig !
Do stellt me ’s z’ Ziiri greesser a,
Schloot Basel, hol ’s der Gugger :
Dert wott AI MA dr Zahldag ha
Vo 83 “Tschugger„ !
Dr Tresorschlissel hangt parat –
E Wach isch nit am Flägg gsi –
’s sinn 87 Mill vom Staat
Wie ’s haidebritsch ewägg gsi !
Dä z’ Basel hänn si glaitig gha –
Dä z’ Ziri tien si sueche
Und mache hitt no Razzia
By Uniforme Rueche !
Das zaigt, wie gyttig d’ Basler sinn
Und wie uff ’s Gäld versässe –
Die z’ Ziri lehn däm Zytt, sy Gwinn
Z’ verhueschte und z’ verfrässe !
Vomene gwise Nyd nitt frei
Sait z’ Basel jede Lappi:
Jetz hänn si z’ Ziri, das isch nej,
Sogar no e Hooch-Stapi !
Und will die z’ Ziri greesser sinn
(Nit nur in Sache Gosche),
Griegt ihre Schelm, hänn sin en dinn,
E goldige Lai als Brosche !
– ’s isch halt nyt z’ mache: Ziri butzt !
Äs liferet aifach Greessers !
Ai Wertli gitt ’s, wo z’ Basel nutzt
Und treeschtet: Gschäch nyt Beesers !