Wär isch 's Wichtigscht in unsrer Schwyzerarmee?
Frögsch en Infantrischt - de bhauptet: Er!
Wär isch 's Wichtigscht in unsrer Schwyzerarmee?
Frögsch en Kavallrischt - de bhauptet: Er!
Nur vo uns redet käin au numme s chlynschti Wort,
Und derby merkt en jede doch sofort:
Es git zum Glück no in der Schwyzerarmee
Gsundi Mann vo der Artillerie!
Denn 's mues doch öpper in der Schwyzerarmee
In der grosse, in der stramme, zääche Schwyzerarmee
En rächti Kanone sy -
En rächti Kanone sy!
Wär isch 's Wichtigscht in unsrer Schwyzerarmee?
Frögsch du d'Offizier - die bhaupte: Si.
Wär isch 's Wichtigscht in unsrer Schwyzerarmee?
Frögsch 's ganz Rösslispiel - die bhaupte: Si!
Jä - die stelle gern sich als Kanone dar -
Und derby wäiss en jede, das ischt klar:
Es git zum Glück no in der Schwyzerarmee
Gsundi Manne vo der Artillerie!
Denn 's mues doch öpper in der Schwyzerarmee,
In der grosse, in der stramme, zääche Schwyzerarmee
En rächti Kanone sy -
En rächti Kanone sy!
Was isch 's Wichtigscht für unsri Schwyzerarmee
Näbe Pulver, Blei - und näbem Muet?
Was isch 's Wichtigscht für unsri Schwyzerarmee:
Das sind d'Mäiteli wie Milch und Bluet!
Da ghörsch nüüt vo der Infantrie und Kavallerie -
's mues en Ma sy vo der Artillerie! -
Denn 's bruucht für d'Zuekumft vo der Schwyzerarmee
Gsundi Manne vo der Artillerie!
Und 's mues doch Buebe gä für d'Schwyzerarmee,
Für die grossi, für die strammi, zäächi Schwyzerarmee -
Do muesch en Kanone sy -
En grossi Kanone sy!
Eines von sieben Liedern aus:
Lieder aus dem Soldatenstück "Gilberte de Courgenay", 1938.
Text: Rudolph Bolo Mäglin
Musik: Hans Haug
(Das Liederbuch bei swissbib)
Lieder aus dem Soldatenstück Gilberte de Courgenay - Wär isch s WichtigschtHier eine Interpretation dieses Liedes aus dem Theaterstück "Gruss an Gilberte" von 1989 (Regie: Jörg Schneider, mit Jörg Schneider, Paul Bühlmann, Sabina Schneebeli u.v.a.).